Í samband við, at talið av koronatilburðum, er so nógv vaksið seinastu tvær vikurnar, hevur Undirvísingarstýrið, sent skúlunum eitt kunnandi skriv, har mælt verður til, at skúlarnir vísa størsta varsemi og seta ávís tiltøk í verk, í fyrstu syfti í 10 dagar.
Hetta kemur at ávirka skúladagin hjá næmingunum.
Tá næmingarnir koma um morgunin, skulu teir fara beint inn í skúlastovuna. Tá tey fara í fríkorter, skulu tey fara beint út. Um veður ikki er at vera úti, skulu næmingarnir vera inni í sínari skúlastovu.
 
Tað er umráðandi, at næmingarnir hava egið pennahús við øllum amboðum - blýantar, litblýantar, blýantspískara, viskileður, linjál, saks, límstift v.m. - alt tað, ið teir hava brúk fyri í undirvísingini.
 
Tey skulu bert vera saman við sínum flokki, so fyribils verður ongin felags morgunsangur, ei heldur kórvenjing.
Næmingarnir skulu vaska sær ella spritta hendurnar, tá tey fara í fríkorter og tá tey koma innaftur. Eisini fara vit at minna tey á, at tey skulu halda frástøðu.
Vit mugu øll vera serliga varin í hesum døgum. Vísir næmingurin sjúkraeyðkenni, skal hann ikki koma í skúla, men skal fara at testa seg, og skal ikki koma í skúla aftur, fyrrenn hann hevur fingið eitt negativt svar.
 
Minnist til at siga okkum frá, um næmingurin ikki kemur í skúla.

Fyri at sleppa undan, at ov nógv fólk koma inn í skúlan, vilja vit heita á tykkum, sum koma  við og eftir næmingum, bert at koma til úthurðina.